Inatsit tunngaviusoq
Ataani atuarneqarsinnaapput utoqqalinermi aammalu siusinaartumik soraarnerussutisiat pillugit inatsisit tunngaviusut. Annertunerusumik paasisaqarnerusinnaavutit Ilaqutariinnermut, Naligiissitaanermut Isumaginninnermullu Naalakkersuisoqarfiup nittartagaani http://naalakkersuisut.gl–imi, inunnik isumaginninnermut tunngasuni inatsisit atuuttut alakkarnerisigut. Tassani Inatsisartut peqqussutaat nalunaarutillu atulersinneqartut atuarneqarlutillu aaneqarsinnaapput.
Utoqqalinermi soraarnerussutisiat
2010-mi januaarip aallaqqaataa aallarnerfigalungu inuit 65-inik ukioqalereersimasut utoqqalinermi soraarnerussutisiaqarsinnaatitaapput.
2014-imi januaarip aallaqqaataa aallarnerfigalungu utoqqalinermi soraarnerussutisiat kisimiittumut ukiumut 129.800 kr.-inik annertussuseqarput. Soraarnerussutisiat annerpaat utoqqalinermi soraarnerussutisialinnut allamik soraarnerussutisiaqartumik aappaqartunut allaanerusarput. Ilanngussami takuneqarsinnaapput soraarnerussutisiat amerlassusaat annerpaat minnerpaallu, soraarnerussutisianut assigiinngitsunut immikkoortiternerini. Nammineq isertitat allat aammalu aapparisap isertitai allat aallaavigalungit soraarnerussutisiat naleqqussarneqartarput. Aapparisap inooqatigisalluunniit isertitaasa akileraarutaasussat annertussusaat apeqqutaatinnangu utoqqalinermi soraarnerussutisialik nammineq allanik isertitaqanngippat pisussaatitaavoq kisimiittumut aningaasat tunngavisut amerlanersaasa 50 procentiatut annertutigisumik soraarnerussutisiaqatitaassalluni.
Utoqqalinermi soraarnerussutisiat meeqqanut tapeqarsinnaapput, soraarnerussutisialik meeqqanik 18-it inorlugit ukiulinnik pilersuisussaatitaappat. Taamatullu utoqqalinermi soraarnerussutisiat aningaasat tunngaviusut saniatigut aaliangersimasumik atugassanik aammalu inummut tapinik ilaneqarsinnaapput.
Utoqqalinermi soraarnerussutisialik utoqqaat illuinut, napparsimmavinni isumaginninnermi immikkoortortaqarfimmut allamulluunniit isumaginninnikkut ulloq unnuarlu angerlarsimaffimmi ineqarlersimappat aningaasat tunngaviusut annerpaartaasa 20 procentia soraarnerussutisiarineqassaaq, aningaasanik tunngaviusunik ilanngakkanik imaluunniit kaasarfimmiunik taaneqartunik, apeqqutaatinnangu soraarnerussutisialik allanik isertitaqartuunera.
Utoqqalinermi soraarnerussutisiat aningaasat tunngaviusut juulip allaqqaataa aallarnerfigalungu ukioq pineqartup siuliani akigititat inissisimaffiinik naleqqersuutip ineriartornera malillugu naleqqussarneqarput.
Inatsisartut inatsisaat nr.3 7. maaji 2007-imeersoq utoqqalinermut soraarnerussutisialinnut, 1. juuli 2007-imi atuutilersumit utoqqalinermi soraarnerussutisiaqartitsisoqarpoq.
Siusinaartumik soraarnerussutisiat
Siusinaartumik soraarnerussutisiat inunnut timikkut, tarnikkut imaluunniit isumaginninnikkut inissisimanermik peqquteqarluni sulinissamut piginnaasat ataavartumik annikillisimappata tunniunneqartarput. Inuit 18-ileereersimasut sulilu 65-iliisimanngitsut siusinaartumik soraarnerussutisiaqarsinnaatitaapput, taamatullu 18-it inorlugit ukiullit siusinaartumik soraarnerussutisiaqarsinnaapput qinnuteqartoq aappaminut, inooqatiminut meeqqamulluunniit pilersuisussaatitaappat.
Siusinaartumik soraarnerussutisiat kisimiittumut ukiumut 106.000 kr.-inik annertussuseqarput. Soraarnerussutisiat annerpaat siusinaartumik soraarnerussutisialinnut allamik soraarnerussutisiaqartumik aappaqartumut allaanerusarput. Ilanngussami takuneqarsinnaapput soraarnerussutisiat amerlassusaat annerpaat minnerpaallu, soraarnerussutisiallit assigiinngitsunut immikkoortitersimanerini. Nammineq isertitat allat aammalu aapparisap isertitai allat aallaavigalungit soraarnerussutisiat naleqqussarneqartarput.
Siusinaartumik soraarnerussutisiat meeqqanut tapeqarsinnaapput, soraarnerussutisialik meeqqanut 18-it inorlugit ukiulinnut pilersuisussaatitaappat, kommunilu najugarisaq aamma inummut tapeqartitsisinnaalluni.
Siusinaartumik soraarnerussutisialik utoqqaat illuinut, napparsimmavinni isumaginninnermi immikkoortortaqarfimmut allamulluunniit isumaginninnikkut ulloq unnuarlu angerlarsimaffimmi ineqalersimappat, aningaasat tunngaviusut annerpaartaasa 20 procentia soraarnerussutisiarineqassaaq aningaasanik tunngaviusunik ilanngakkanik imaluunniit kaasarfimmiunik taaneqartunik, apeqqutaatinnangu siusinaartumik soraarnerussutisialik allanik isertitaqartuunera.
Inatsisartut inatsisaat nr. 4 7. maaji 2007-imeersoq siusinaartumik soraarnerussutisialinnut 31. maaji 2010-mi atuutilersumit siusinaartumik soraarnerussutisiaqartitsisoqarpoq.